Fernán Morán.
Presidente de la Lliga Celta d’Asturies.
Llión, el País Lleonés va consiguir la so autonomía, por fin vase a enmendar un erru históricu, la comunidá autónoma de Castiella y Llión. Llión enxamás debió tar xunida a Castiella, ye una xirigonza y supongo que vamos tener d’entruganos como asocedió esta sinrazón.
Si retrotrayémonos a los empiezos de los 80 cuando se taben configurando les actuales comunidaes históriques, non pocos políticos ya intelectuales abogaron nun primer momentu por crear una comunidá autónoma compuesta per Asturies y Llión, la comunidá Asturlleonesa, cosa bastante lóxica por razones culturales, históriques, llingüístiques y sanguínees, como vamos ver más palantre. Pero nun cuayó y, neso, muncha culpa tener el socialismu asturiano que s’ofuscó en qu’Asturies tendría de dir sola… otru erru históricu. Tamién hai que dicir a esti respectu que Martín Villa tamién influyó enforma na variante cismontana para evitar lo natural, lo deseable per dambes partes d’un tou. Sicasí, había y sigue habiendo ensame d’intelectuales y políticos n’Asturies que sofitaríen la creación d’esta comunidá ensin pensalo dos vegaes, como por casu Xosé García Arias, llicenciáu en Filosofía y Lletres y doctoráu en Llingües Romániques, miembru de l’Academia de la Llingua Asturiana, él lo llamara País Ástur, ente munchos otros d’un llau y otru del cordal.
Enantes referí los venceyos históricos, culturales, llingüísticos y sanguíneos que “xunen” dambes naciones, Asturies y el País Llionés, con éses, voi faer una pequeña y somera reflexón al respeutu, casi citando a cencielles evidencies que toos conocemos y que son llargamente contrastables por cualesquier.
Voi empezar esta pequena andadura historiográfica pola protohistoria, cuando un exércitu invasor denominónos “ástures” y nos circunscribió a un territoriu, “Asturia” (Conventum Asturicum), con capital en Astúrica Augusta (actual Astorga). Lo primero que voi analizar ye’l nome de la nuesa etnia, l’ástur. El vocablu “asturia” paez que vien de la denominación de los romanos fixeron de los habitantes a veres del ríu ástura (güei Esla), y nun ye cualquier cosa porque esti vocablu, “ástura” vien del raigañu celta *Stour que sinifica “corriente d’agua” y que pudo tener la siguiente derivación:
Stour>stur>stura>astura>astur(i)a>asturia(s).
Queda bastante evidenciáu que’l nome de la nuesa etnia ye d’orixe célticu.
Prosigamos, una cultura, por definición ye un conxuntu de manifestaciones qu’una comunidá fai, materiales ya inmateriales de la so cosmovisión, esto ye, de cómo entiende la realidá que lu arrodia. A esti respectu, dempués de delles (poques al mio pensar), escavaciones en dellos castros ástures, tantu cismontanos como transmontanos, atopamonos con un conxuntu d’oxetos d’orfebrería, cerámica, ferramientes, etc, de la era que nos indiquen una celticidad manifiesta: torques, brazaletes, fíbules, hachos bifaces, espaes d’antenes…etc. Coles mesmes tol panteón relixosu ástur correspondese con deidaes céltiques en dambos llaos del cordal atopamos deidaes celtes como: Lug, Belenos, Teleno, Bandua, Nimmedo, Vindonius, Cossuo… etc.
Otra de les evidencies de la cohesión étnica de los ástures ye como s’entamen para combatir al invasor, reconocíense como iguales y lluchaben de mancomún por un oxetivu común, la llibertá. Podría siguir argumentando elementos materiales ya inmateriales que determinen claramente que los ástures somos un pueblu de la mesma etnia, que tenemos una cultura compartida y, como vamos ver más palantre, que la siguimos compartiendo.
Trescurre’l tiempu y allá pol añu 718, los ástures trasmontanos remontense contra la ocupación islámica y, col sofitu de la nobleza cántabra nun principiu, empiecen la revuelta ástur na conocida batalla de Cuadonga que da llugar al orixe d’un reinu, el Reinu Ástur o Asturorum Regnum a raigañu del nomamientu de Pelayo como Princeps (que non rei), de los ástures en Cangues d’Onís col sofitu de 519 nobles astures y cántabros (el númberu de nobles varia llixeramente según la fonte consultada). Esti reinu medieval, tamién denomináu Reinu de Oveto y Reinu d’Asturies, va espandiéndose, creciendo y recibiendo el sofitu de más y más nobles hasta que llegamos al treslláu de la capital del reinu a Llión por razones estratéxiques y loxístiques nel sieglu X, dando llugar unos años dempués al Reinu de Llión, continuación del Reinu de los Ástures o Astourorum Regnum. Mesmu reinu, mesma dinastía, mesmu orixe… na alta Edá Media, siguimos siendo un pueblu, con una mesma llingua, con un mesmu oxetivu.
Depués llega’l Reinu de Castiella y ende sí que se da una dómina convulsa n’Asturies con revultas en contra de los monarques de la dómina, fáennos “Principáu” y demás, pero los venceyos con Llión siguíen ende.
Ello ye que yá na dómina contemporanea, nel 1937, llegase a crear el Conseyu Soberanu d’Asturies y Llión, con capital en Xixón, presidíu por Belarmino Tomás, llegando a crear inclusive moneda, sellos propios y embaxada nel Reinu Xuníu.
Bien, como de seguro vais agradeceme más d’unu, nun estendime demasiáu tocantes a la historiografía común d’Asturies y Llión, pero creo que se dan elementos abondos como para ver una coiné cultural fuerte y sólida ente dambes naciones a lo llargo de la hestoria.
Amás d’evitar afondar en detalles históricos, tamién dexé un pocu de llau un montón d’elementos culturales y antropolóxicos comunes que tamién nos xunen: minería, mitoloxía, ritos y celebraciones…Daríame pa un llibru enteru polo menos!
Antes falé de cosanguinidad, nun sé si ye necesariu esclariar esto pero voi faer unes cuantes entrugues que quiciabes xeneren respuestes por sí mesmes: ¿Cuántes persones de Llión trabayen y viven n’Asturies? Y d’éstes persones, ¿cuántes tán casaes con asturianos y tuvieron descendencia? A lo llargo de tol cordal Cantábricu… ¿cuántes pareyes y matrimonios con descendencia surdieron ente dambes naciones a lo llargo de los conceyos de la nuesa “frontera”? Feches les entrugues, si les retrucástis voi faevos otra… Dempués de too lo lleío y habiendo vistu nuesa historiografía común… ¿Daquién piensa
de verdá que nun hai venceyos de sangre ente les nueses dos naciones? Pensái nello por favor.
Dientro del ámbitu cultural creo importante y necesariu falar de la llingüística. Asturies y Llión falen en mesmu idioma en dos variedaes dialectales, l’asturianu y el lleonés, dambos del tueru asturlleonés, al igual que los nuesos hermanos culturales de Miranda do Douro col so mirandés. Como toos sabéis, unu de los elementos diferenciadores y identitarios más importantes d’una nación ye la so llingua, y nós, queríos hermanos y hermanes cismontanos, tenemos la mesma llingua… nun sé a vós, pero a mi paezme daqué realmente importante que tenemos de valorar, promocionar y caltener pa les xeneraciones futures.
Esto, según dixéronme va ser para una entrada d’un blogue polo que nun tien enforma sentíu estendese hasta l’infinitu, que podríamos no que fai a la relación ente Asturies y Llión, pero creo que ye meyor quedase con cuestiones básiques y elementales y dende ehí que cada unu afonde en tou esto na midida que quiera. Hai un proverbiu celta que diz: “Un pueblu que nun conoz y valora el so pasáu, ta condergáu a nun tener un futuru” El pasáu del pueblu llionés ye munchu más antiguu qu’el sieglu X.
Prestaríame concluyir esta entrada con delles coses que considero verdaes:
– Los pueblos asturiano y lleonés son el mesmu pueblu, la mesma étnia: la étnia celtoastur.
– Dambos pueblos caltenemos y usamos la mesma llingua.
– Los venceyos históricos, culturales, llingüísticos y de sangre ente Asturies y Llión son fechos.
– Anguaño, por razones diverses, somos dos naciones, pero podemos ser dos naciones hermanes.
Asturies y el pueblu asturianu sofita a Llión na so llucha pola so propia autonomía, autonomía más que necesaria y lexítima, la unión de Llión y Castiella nuna comunidá autónoma ye un erru históricu. Esperamos qu’una vegada algaméis la vuesa autonomía, queráis tanto como nós, xenerar y crear llazos de xermandía ente dambes naciones pa trabayar y lluchar pola nuesa identidá, cultura y llingua comunes amás de polos nuesos intereses.
