PUEMA LLIONÉS
Nela demora del tiempu
Escurez la tarde,
Las houras nun pasan
Y siléncianse las espresiones
Alegándo-ye a la hestoria
Truenas d’esqueizu
En retumbríos repitios,
Comu ensí n destín los rayos
Sobro pastrana qu’agoniza
N’alo d’andurina
Que nela mia casa nun ñiala,
Patios y xardines
Ensín voces nin rebrincos
Nin ifancia nin adolescencia
Nin beisos nelos requeixos,
Namás escañiles pa seniles,
Xaz el futuru.
¡Espertemos!
¡Llïonés, llïoneses, llechemos!
¡LLión muérrese!
Pur ú trescurren las auguas
Qu’aguesponun las llágrimas,
Que dixuagonun la nuesa mancor
Y afogonun las nuesas señardaes,
Agora navegan barcos piratas
Cun capitanes de pata palu
Y tuertos cun colmiellos de Drácula
Que chupan el nuesu mañana,
Sangre de reinas y reis
Que nelas nueites ensín lluna
Y albeares ensín sol
Cuerre pulas venas
De los nuesos puebros y cais
Carentes de lluz
Altraviesan las pupulas
Y frayan las gueyadas
Rodillando’l nuesu futuru
¡Alcémonos!
¡Llïonés, llïoneses, lluchemos!
Llión muérrese
Méndigu de sospiros
Y de promesas atrasiadas
Nelos vaticinios del papiru
Que marcará’l nuesu camín,
Guei torno al pasáu
De papeles maltratáos,
Añourada soledá
Que nun me diesti oportunidá,
Enxamás Llión sintíuse
Más aislláu y solu
Que cun Castiella
Verdugos ensípidos
Griñando repuelges,
Trenta años de miseria,
Que nesti país
Enxamás cumplíu tanta cundena
Nin el pior de los asesinos
¡Vivamos!
¡Llïonés, llïoneses, lluchemos!
¡Llión muérrese!
Tierra morimunda,
Roupa estrangallada, alma vendida,
Pasos ensín dóminu, fonda ferida,
Encomprensible etnocidiu,
Guei somos ifiernu
A l’aguarda de los requiscantes
Pa saldare los sous apuntes
Cun xosticia de piedra,
Inxustos cun alma de sabre,
Chistéstedes los nuesos glayios,
Afogéstedes las nuesas espranzas,
Piséstedes las nuesas razones
Peru enxamás podredes silenciareLlos llatios de los nuesos corazones,
forxemos el nuesu destín
Los nuesos ancestros
Domándanoslu.
¡Amezámonos!
¡Llïonés, llïoneses, lluchemos!
¡Llión muérrese!
Aruma de frores enxiutas
Enbreciando las lleis,
Gerreros ensín llanzas,
Muyeres de llutu, bandeira ñiegra,
Puetas ensín sitiu
Nin llugar ú aseitare
Las lletras de la verdá,
Na más el friéu del ruciéu
Envítame a suañare
Cuna espada de la llibertá,
Escuérrese la tinta
Nel talludu beisu de la pruma
Y la pregaria del alón
Nela antesala de la muerte,
Pur estimate Llión
Vóume cuntiéu,
Pórtote cunmiéu.
¡Suañemos!
¡Llïonés, Llïoneses,lluchemos!
¡Llión muérrese!
© Ánxel ®
